|| ఓం ||
దేవ్యువాచ || 1 ||
ఏభిః స్తవైశ్చ మాం నిత్యం స్తోష్యతే యః సమాహితః |
తస్యాహం సకలాం బాధాం శమయిష్యామ్యసంశయమ్ || 2 ||
మధుకైటభనాశం చ మహిషాసురఘాతనమ్ |
కీర్తయిష్యంతి యే తద్వద్వధం శుంభనిశుంభయోః || 3 ||
అష్టమ్యాం చ చతుర్దశ్యాం నవమ్యాం చైకచేతసః |
శ్రోష్యంతి చైవ యే భక్త్యా మమ మాహాత్మ్యముత్తమమ్ || 4 ||
న తేషాం దుష్కృతం కించిద్దుష్కృతోత్థా న చాపదః |
భవిష్యతి న దారిద్ర్యం న చైవేష్టవియోజనమ్ || 5 ||
శత్రుభ్యో న భయం తస్య దస్యుతో వా న రాజతః |
న శస్త్రానలతోయౌఘాత్ కదాచిత్ సంభవిష్యతి || 6 ||
తస్మాన్మమైతన్మాహాత్మ్యం పఠితవ్యం సమాహితైః |
శ్రోతవ్యం చ సదా భక్త్యా పరం స్వస్త్యయనం మహత్ || 7 ||
ఉపసర్గానశేషాంస్తు మహామారీసముద్భవాన్ |
తథా త్రివిధముత్పాతం మాహాత్మ్యం శమయేన్మమ || 8 ||
యత్రైతత్ పఠ్యతే సమ్యఙ్నిత్యమాయతనే మమ |
సదా న తద్విమోక్ష్యామి సాన్నిధ్యం తత్ర మే స్థితమ్ || 9 ||
బలిప్రదానే పూజాయామగ్నికార్యే మహోత్సవే |
సర్వం మమైతన్మాహాత్మ్యముచ్చార్యం శ్రావ్యమేవ చ || 10 ||
జానతాఽజానతా వాపి బలిపూజాం తథా కృతామ్ |
ప్రతీక్షిష్యామ్యహం ప్రీత్యా వహ్నిహోమం తథా కృతమ్ || 11 ||
శరత్కాలే మహాపూజా క్రియతే యా చ వార్షికీ |
తస్యాం మమైతన్మాహాత్మ్యం శ్రుత్వా భక్తిసమన్వితః || 12 ||
సర్వబాధావినిర్ముక్తో ధనధాన్యసమన్వితః |
మనుష్యో మత్ప్రసాదేన భవిష్యతి న సంశయః || 13 ||
శ్రుత్వా మమైతన్మాహాత్మ్యం తథా చోత్పత్తయః శుభాః |
పరాక్రమం చ యుద్ధేషు జాయతే నిర్భయః పుమాన్ || 14 ||
రిపవః సంక్షయం యాంతి కల్యాణం చోపపద్యతే |
నందతే చ కులం పుంసాం మాహాత్మ్యం మమ శృణ్వతామ్ || 15 ||
శాంతికర్మణి సర్వత్ర తథా దుఃస్వప్నదర్శనే |
గ్రహపీడాసు చోగ్రాసు మాహాత్మ్యం శృణుయాన్మమ || 16 ||
ఉపసర్గాః శమం యాంతి గ్రహపీడాశ్చ దారుణాః |
దుఃస్వప్నం చ నృభిర్దృష్టం సుస్వప్నముపజాయతే || 17 ||
బాలగ్రహాభిభూతానాం బాలానాం శాంతికారకమ్ |
సంఘాతభేదే చ నృణాం మైత్రీకరణముత్తమమ్ || 18 ||
దుర్వృత్తానామశేషాణాం బలహానికరం పరమ్ |
రక్షోభూతపిశాచానాం పఠనాదేవ నాశనమ్ || 19 ||
సర్వం మమైతన్మాహాత్మ్యం మమ సన్నిధికారకమ్ || 20 ||
పశుపుష్పార్ఘ్యధూపైశ్చ గంధదీపైస్తథోత్తమైః |
విప్రాణాం భోజనైర్హోమైః ప్రోక్షణీయైరహర్నిశమ్ || 21 ||
అన్యైశ్చ వివిధైర్భోగైః ప్రదానైర్వత్సరేణ యా |
ప్రీతిర్మే క్రియతే సాఽస్మిన్ సకృదుచ్చరితే శ్రుతే || 22 ||
శ్రుతం హరతి పాపాని తథాఽఽరోగ్యం ప్రయచ్ఛతి |
రక్షాం కరోతి భూతేభ్యో జన్మనాం కీర్తనం మమ || 23 ||
యుద్ధేషు చరితం యన్మే దుష్టదైత్యనిబర్హణమ్ |
తస్మింఛ్రుతే వైరికృతం భయం పుంసాం న జాయతే || 24 ||
యుష్మాభిః స్తుతయో యాశ్చ యాశ్చ బ్రహ్మర్షిభిః కృతాః |
బ్రహ్మణా చ కృతాస్తాస్తు ప్రయచ్ఛంతు శుభాం మతిమ్ || 25 ||
అరణ్యే ప్రాంతరే వాపి దావాగ్నిపరివారితః |
దస్యుభిర్వా వృతః శూన్యే గృహీతో వాపి శత్రుభిః || 26 ||
సింహవ్యాఘ్రానుయాతో వా వనే వా వనహస్తిభిః |
రాజ్ఞా క్రుద్ధేన చాజ్ఞప్తో వధ్యో బంధగతోఽపి వా || 27 ||
ఆఘూర్ణితో వా వాతేన స్థితః పోతే మహార్ణవే |
పతత్సు చాపి శస్త్రేషు సంగ్రామే భృశదారుణే || 28 ||
సర్వబాధాసు ఘోరాసు వేదనాభ్యర్దితోఽపి వా |
స్మరన్మమైతచ్చరితం నరో ముచ్యేత సంకటాత్ || 29 ||
మమ ప్రభావాత్ సింహాద్యా దస్యవో వైరిణస్తథా |
దూరాదేవ పలాయంతే స్మరతశ్చరితం మమ || 30 ||
ఋషిరువాచ || 31 ||
ఇత్యుక్త్వా సా భగవతీ చండికా చండవిక్రమా |
పశ్యతాం సర్వదేవానాం తత్రైవాంతరధీయత || 32 ||
తేఽపి దేవా నిరాతంకాః స్వాధికారాన్ యథా పురా |
యజ్ఞభాగభుజః సర్వే చక్రుర్వినిహతారయః || 33 ||
దైత్యాశ్చ దేవ్యా నిహతే శుంభే దేవరిపౌ యుధి |
జగద్విధ్వంసకే తస్మిన్ మహోగ్రేఽతులవిక్రమే || 34 ||
నిశుంభే చ మహావీర్యే శేషాః పాతాలమాయయుః || 35 ||
ఏవం భగవతీ దేవీ సా నిత్యాపి పునః పునః |
సంభూయ కురుతే భూప జగతః పరిపాలనమ్ || 36 ||
తయైతన్మోహ్యతే విశ్వం సైవ విశ్వం ప్రసూయతే |
సా యాచితా చ విజ్ఞానం తుష్టా ఋద్ధిం ప్రయచ్ఛతి || 37 ||
వ్యాప్తం తయైతత్సకలం బ్రహ్మాండం మనుజేశ్వర |
మహాదేవ్యా మహాకాలీ మహామారీస్వరూపయా || 38 ||
సైవ కాలే మహామారీ సైవ సృష్టిర్భవత్యజా |
స్థితిం కరోతి భూతానాం సైవ కాలే సనాతనీ || 39 ||
భవకాలే నృణాం సైవ లక్ష్మీర్వృద్ధిప్రదా గృహే |
సైవాభావే తథాఽలక్ష్మీర్వినాశాయోపజాయతే || 40 ||
స్తుతా సంపూజితా పుష్పైర్గంధధూపాదిభిస్తథా |
దదాతి విత్తం పుత్రాంశ్చ మతిం ధర్మే గతిం శుభామ్ || 41 ||
|| ఓం ||
ఇతి శ్రీమార్కండేయపురాణే సావర్ణికే మన్వంతరే దేవీమాహాత్మ్యే భగవతీ వాక్యం నామ ద్వాదశోఽధ్యాయః || 42 ||
(ఉవాచమంత్రాః – 2, అర్ధమంత్రాః – 2, శ్లోకమంత్రాః – 37, ఏవం – 41, ఏవమాదితః – 671)
